ᑖᒃᑯᐊ ᑐᓴᐅᒪᔾᔪᑏᑦ ᐋᖅᑭᒃᓱᑕᐅᓚᐅᖅᑐᑦ ᑖᔅᓱᒧᖓ ᐃᑭᐊᖅᑭᕕᖕᒧᑦ ᑖᒃᑯᓇᙵᑦ ᐋᓐᓂᐊᖃᕐᓇᙱᑦᑐᓕᕆᔨᓪᓚᕆᖕᓂᒃ ᐊᒻᒪᓗ ᑭᒃᑯᓕᒫᑦ ᐋᓐᓂᐊᖃᕐᓇᙱᑐᓕᕆᓂᕐᒧᑦ ᖃᐅᔨᒪᔨᑕᕐᓂᒃ ᐊᑐᖅᖢᑎᒃ ᑲᓇᑕᐅᑉ ᒐᕙᒪᖏᓐᓂᒃ ᐊᒻᒪᓗ ᐊᓯᖏᓐᓂᒃ ᑭᒡᓕᓯᓂᐊᖅᓂᕐᒧᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᖔᖅᑐᓂᒃ. ᑐᑭᒋᙱᑖ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᖃᐅᔾᔨᒋᐊᕈᑎᐅᓗᓂ. ᕿᓂᖃᑦᑕᕐᓗᓯ ᐊᔪᙱᔾᔪᑎᓕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᖅᑎᓂᒃ ᐊᐱᖅᑯᑎᒃᓴᖃᕌᖓᔅᓯ ᓄᕙᒡᔪᐊᕐᓇᖅ-19-ᒧᑦ ᑲᐴᑎᐅᑉ ᒥᒃᓵᓄᑦ.
ᐄ, ᐃᓄᐃᑦ ᐊᐃᑦᑐᕐᓗᒃᑕᐅᓯᒪᓚᐅᖅᑐᑦ ᓄᕙᒡᔪᐊᕐᓇᖅ-19-ᒧᑦ ᐊᑕᖏᖅᑐᒥᒃ ᑲᐱᔭᐅᓯᒪᓪᓗᐊᖅᑐᐃᑦ ᒪᕐᕈᐃᖅᓱᕐᓗᑎᒃ ᑲᐱᔭᐅᓗᑎᒃ. ᖃᐅᔨᒪᔪᕐᔪᐊᑦ ᖃᐅᔨᒪᙱᑦᑐᑦ ᓱᓕ ᖃᓄᖅ ᐊᑯᓂᐅᑎᒋᔪᒥᒃ ᓴᐳᔾᔭᐅᓯᒪᔪᓐᓇᕐᒪᖔᖅᐱᑦ ᐋᓐᓂᐊᓕᒃᑲᓐᓂᖁᓇᒃ ᐊᓐᓇᓚᐅᖅᑎᓪᓗᑎᑦ ᑖᔅᓱᒪᖓᑦ ᓄᕙᒡᔪᐊᕐᓇᖅ-19-ᒥᑦ. ᑲᐴᑏᑦ ᐃᑲᔪᕐᓂᐊᖅᑐᑦ ᓴᐳᔾᔨᓗᑎᒃ ᐃᓕᓂᒃ ᓴᓇᓗᑎᒃ ᐊᓐᓇᐅᒪᔾᔪᑎᓂᒃ ᖃᓄᐃᓕᐅᕈᓐᓇᖅᑐᓂᒃ ᐋᓐᓂᐊᙱᓪᓗᑎᑦ.
ᒫᓐᓇᕋᑖᖅ ᓄᕙᒡᔪᐊᕐᓇᖅ-19-ᒧᑦ ᖃᓂᒪᓚᐅᕈᕕᑦ, ᐅᑕᖅᑭᓪᓗᐊᖅᑐᑎᑦ ᖃᓄᐃᑦᑐᓐᓃᑦᑎᐊᕈᕕᑦ ᐊᒻᒪᓗ ᓇᖕᒥᓂᖅ-ᐃᓄᑑᓃᑦ ᐊᓂᒍᖅᓯᒪᓕᖅᐸᑦ ᑲᐱᔭᐅᔪᒪᒍᕕᑦ.
ᑲᐱᔭᐅᓚᐅᕈᕕᑦ mRNA ᑲᐴᑎᒧᑦ (ᕙᐃᓱ-ᐸᐃᐋᓐᑕᒃ [Pfizer-BioNTech] ᐅᕝᕙᓘᓐᓃᑦ ᒪᑑᓇ [Moderna]) ᓯᕗᓪᓕᐅᓪᓗᓂ ᑲᐱᔭᐅᔾᔪᑎᒋᓗᒍ, ᐊᐱᕆᔭᐅᓂᐊᖅᑐᑦ mRNA ᑲᐴᑎᒧᑦ ᑭᖑᓪᓕᕐᒥᑦ ᑲᐱᔭᐅᓛᕈᒪᖕᒪᖔᖅᐱᑦ. ᐱᐅᒋᔭᐅᓂᖅᓴᐅᔪᖅ ᑲᐱᔭᐅᒍᕕᑦ ᑖᒃᑯᓄᖓᑦᑕᐃᓐᓇᖅ ᑯᐴᑎᓄᑦ ᓯᕗᓪᓕᕐᒥᑦ ᑲᐱᔭᐅᔾᔪᑎᒋᓚᐅᖅᑕᕐᓄᑦ, ᑭᓯᐊᓂ ᐊᑐᐃᓐᓇᐅᑲᐅᑎᒋᙱᒃᑯᑎᒃ ᐅᕝᕙᓪᓘᓐᓃᑦ ᖃᐅᔨᒪᔭᐅᙱᒃᑯᓂ, ᑕᐃᒪᐃᓐᓂᕈᓂ ᖃᓄᐃᙱᑦᑐᖅ ᑲᐱᔭᐅᔭᕆᐊᒃᓴᖅ ᐊᔾᔨᒌᙱᑦᑐᓄᑦ mRNA ᑲᐴᑎᓄᑦ. ᑕᒪᕐᒥᒃ ᐊᔾᔨᒌᒃᑐᒥᒃ ᐊᑦᑕᕐᓇᙱᑦᑐᑦ ᐊᒻᒪᓗ ᐊᑑᑎᖃᖅᑐᐃᓐᓇᐃᑦ.
ᑲᐱᔭᐅᓐᓂᕈᕕᑦ ᐋᔅᑐᕋᔾᔨᓂᑲᒧᑦ (AstraZeneca) ᓯᕗᓪᓕᕐᒥᑦ ᑲᐱᔭᐅᑎᓪᓗᒋᑦ, ᓂᕈᐊᕈᓐᓇᖅᑐᑎᑦ ᐋᔅᑐᕋᔾᔨᓂᑲ (AstraZeneca) ᑭᖑᓪᓕᕐᒧᑦ ᑲᐱᔭᐅᔾᔪᑎᒋᓗᒍ, ᑭᓯᐊᓂ ᑲᓇᑕᒥᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᐊᓛᖏᑦ ᑲᐱᔭᐅᖃᑦᑕᕐᓂᕐᒧᑦ (NACI) ᒪᓐᓇ ᐊᑐᖔᖁᔨᔪᑦ ᑲᐱᔭᐅᓗᑎᒃ mRNA ᑲᐴᑎᒧᑦ ᑭᖑᓪᓕᕐᒥᑦ ᑲᐱᔭᐅᒃᑲᓐᓂᓕᕈᕕᑦ.
ᐊᑕᖏᖅᖢᒋᑦ ᑲᐴᑏᑦ ᐊᖏᖅᑕᐅᓯᒪᔪᑦ ᐊᑐᖅᑕᐅᔪᓐᓇᖅᖢᑎᒃ ᑲᓴᑕᒥᑦ ᐊᔾᔨᒌᒥᑦ ᐊᒻᒪᓗ ᐊᑑᑎᖃᑦᑎᐊᖅᑐᑦ ᐋᓐᓂᐊᕐᕕᓕᐊᙱᓐᓂᖅᓴᐅᓂᕐᒧᑦ ᐋᓐᓂᐊᓗᐊᖅᑎᑦᑎᙱᖢᑎᒡᓗ, ᐊᒻᒪᓗ ᐊᑕᖏᖢᒃᑖᐸᓗᒃᖢᑎᒃ 100%-ᒥᒃ ᐊᑑᑎᖃᖅᑐᑦ ᓄᕙᒡᔪᐊᕐᓇᖅ-19-ᒥᑦ ᐃᓅᔪᓐᓃᖅᑎᑦᑎᑦᑕᐃᓕᒪᓂᕐᒧᑦ.
ᐱᒻᒪᕆᐅᔪᖅ ᖃᐅᔨᔭᐅᓗᓂ ᐅᑕᖅᑭᓪᓗᐊᙱᑦᑐᑎᑦ ᑲᐱᔭᐅᓂᕐᒧᑦ ᒪᕐᕉᖕᓄᑦ ᐊᑕᖏᖅᑐᒥᒃ ᓴᐳᔾᔭᐅᓯᒪᖁᓪᓗᑎᑦ. ᓄᑖᑦ ᖃᓂᒪᓇᕐᒧᑦ ᐊᔾᔨᒋᙱᐊᕐᔪᒃᑕᖏᑦ ᓴᖅᑭᑉᐸᓪᓕᐊᖕᒪᑕ ᐅᓄᖅᓯᕙᓪᓕᐊᓪᓗᑎᒃ, ᐋᓐᓂᐊᕐᕕᖕᒦᓕᖃᑦᑕᕐᓃᑦ ᐊᒻᒪᓗ ᑐᖁᖃᑦᑕᕐᓃᑦ, ᐃᓄᒋᐊᑦ ᑲᐱᔭᐅᓂᖏᑦ ᓄᖅᑲᖅᑎᑦᑎᔪᓐᓇᖅᑐᑦ ᑕᒪᑐᒥᖓ.
ᑭᓇᑐᐃᓐᓇᖅ ᑲᐱᔭᐅᓯᒪᔪᖅ ᓱᓕ ᒪᓖᓐᓇᕆᐊᓕᒃ ᐋᓐᓂᐊᖃᖅᑕᐃᓕᒪᑎᑦᑎᔩᑦ ᒪᓕᒃᑕᐅᔪᒃᓴᖁᑎᖏᓐᓂᒃ. ᑲᐱᔭᐅᕌᓂᒃᓯᒪᓕᕈᕕᑦ, ᐱᒻᒪᕆᐅᓪᓚᕆᖕᓂᐊᖅᑐᖅ ᑲᔪᓯᓗᑎᑦ ᐊᑐᕋᓱᒃᐸᒡᓗᒋᑦ ᐊᐃᑦᑐᕐᓗᒃᑕᐅᑦᑕᐃᓕᒪᓂᕐᒧᑦ ᐊᑐᖁᔭᐅᔪᑦ, ᐃᓚᐅᓪᓗᑎᒃ ᐊᒡᒐᑎᑦ ᐅᐊᓴᖃᑦᑕᕐᓗᒋᑦ, ᐅᖓᓰᓐᓇᕋᓱᒃᐊᒡᓗᑎᑦ, ᒪᑐᐊᖅᓯᒪᖃᑦᑕᕐᓗᑎᑦ, ᐊᒻᒪᓗ ᐊᖏᕐᕋᖅᓯᒪᕙᒡᓗᑎᑦ ᐋᓐᓂᐊᓕᕌᖓᕕᑦ. ᐊᒥᓱᒐᓚᐅᔪᑦ ᐱᔾᔪᖏᑦ ᑕᒪᓐᓇ ᐱᒻᒪᕆᐅᓂᖓᓄᑦ:
ᕿᓚᒻᒥᐅᓛᖑᔪᓐᓇᖅᑕᖓ ᒪᕐᕉᒃ ᐱᓇᓱᐊᕈᓰᒃ ᑎᒥᕕᑦ ᓴᐳᔾᔨᔪᓐᓇᖅᓯᓇᔭᕐᓂᖓ ᑖᔅᓱᒪᙵᑦ ᓄᕙᒡᔪᐊᕐᓇᖅ-19-ᒧᑦ ᑲᐴᑎᒥᑦ. ᑕᒪᓐᓇ ᑐᑭᖃᖅᑐᖅ ᐊᐃᑦᑐᕐᓗᒃᑕᐅᓐᓂᕈᕕᑦ ᓄᕙᒡᔪᐊᕐᓇᖅ-19-ᒧᑦ ᑲᐱᔭᐅᖅᑳᖅᑎᓐᓇᒃ, ᐅᕝᕙᓘᓐᓃᑦ ᐃᓗᐊᓂᑦ ᒪᕐᕉ-ᐱᓇᓱᐊᕈᓰᒃ ᑲᐱᔭᐅᓚᐅᖅᑎᓪᓗᑎᑦ, ᐋᓐᓂᐊᓕᕈᓐᓇᖅᑐᑎᑦ ᓱᓕ ᑖᔅᓱᒪᙵᑦ ᓄᕙᒡᔪᐊᕐᓇᖅ-19-ᒧᑦ. ᓇᓗᓇᐃᕈᑎᖃᕈᕕᑦ ᓄᕙᒡᔪᐊᕐᓇᖅ-19-ᒧᑦ ᑲᐱᔭᐅᕌᓂᒃᓯᒪᓕᖅᑎᓪᓗᑎᑦ, ᖃᐅᔨᓴᖅᑕᐅᔭᕆᐊᖃᖅᑐᑎᑦ.
ᑲᐴᑎ ᓄᖅᑲᖅᑎᑦᑎᔪᓐᓇᙱᒻᒪᑦ ᑭᒃᑯᓕᒫᓂᒃ ᐊᐃᑦᑐᕐᓗᒃᑕᐅᓂᕐᒧᑦ ᓄᕙᒡᔪᐊᕐᓇᖅ-19-ᒧᑦ. ᑕᐃᒃᑯᐊ ᐋᓐᓂᐊᓕᖅᑐᕕᓃᑦ, ᐋᓐᓂᐊᓗᐊᕋᔭᕋᓱᒋᔭᐅᙱᑦᑐᑦ.
ᐊᑐᐃᓐᓇᐅᔪᑦ ᑲᐴᑏᑦ ᐊᑑᑎᖃᕐᔪᐊᖅᑐᑦ, ᑭᓯᐊᓂᓕ ᐅᓄᙱᑦᑐᑦ ᐃᓄᐃᑦ ᐊᓐᓇᐅᒪᔾᔪᑎᖃᖁᓐᓇᙱᑦᑐᑦ. ᐊᐃᑦᑐᕐᓗᐃᔪᓐᓇᖅᑐᑦ ᓱᓕ ᓄᕙᒡᔪᐊᕐᓇᖅ-19-ᒧᑦ ᑕᑯᖃᑎᒌᖃᑦᑕᕈᕕᑦ ᐃᓄᖕᓂᒃ ᖃᓂᒋᓗᐊᖅᐸᒡᓗᒋᑦ ᐅᕝᕙᓘᓐᓃᑦ ᒪᓕᖃᑦᑕᙱᒃᑯᕕᑦ ᒪᓕᒃᑕᐅᖁᔭᐅᔪᓂᒃ.
ᐋᒃᑲ, ᑲᐱᔭᐅᓂᖅ ᓄᕙᒡᔪᐊᕐᓇᖅ-19-ᒧᑦ ᓇᖕᒥᓂᖅ ᐱᔪᒪᓗᑎᑦ ᑭᓯᐊᓂ. ᓂᕈᐊᕈᓐᓇᖅᑐᑎᑦ ᑕᐃᒪᐃᑦᑐᒪᙱᒃᑯᕕᑦ ᑕᐃᒪᐃᑦᑐᒪᒍᕕᑦ ᓄᕙᒡᔪᐊᕐᓇᖅ-19-ᒧᑦ ᑲᐱᔭᐅᓗᑎᑦ.
ᐊᑕᖏᖅᖢᑎᒃ ᓄᓇᖃᖅᑐᑦ ᑲᓇᑕᒥᑦ, ᐃᒪᐃᒃᑲᓗᐊᕈᓂ ᓄᓇᑐᖃᖓᑕ ᐊᓯᐊᓄᑦ ᐃᓯᖅᐸᓪᓕᐊᔪᑦ ᖃᓄᐃᓕᖓᓂᖏᑦ, ᑲᐱᔭᐅᔪᓐᓇᖅᑐᑎᑦ ᓄᕙᒡᔪᐊᕐᓇᖅ-19-ᒧᑦ ᑲᐴᑎᒧᑦ. ᐱᖃᕆᐊᖃᙱᑦᑐᑎᑦ ᐊᑐᕈᓐᓇᖅᑐᒥᒃ ᐃᒻᒥᒧᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᓇᐃᓴᐅᑎ (PHN). ᒫᓐᓇ, ᐃᓄᐃᑦ 18-ᓂᒃ ᐅᑭᐅᖅᑲᖅᑐᑦ ᐊᒻᒪᓗ ᐅᖓᑖᓂᑦ ᑲᐱᔭᐅᔪᓐᓇᖅᑐᑦ ᒪᑑᓇ (Moderna), ᐋᔅᑐᕋᔾᔨᓂᑲ (AstraZeneca) ᐊᒻᒪ ᔮᓐᓴᓐ ᐊᒻᒪᓗ ᔮᓐᓴᓐ (Johnson & Johnson) ᑲᐴᑎᓄᑦ. ᐃᓄᐃᑦ 12-ᓂᒃ ᐅᑭᐅᖅᑲᖅᑐᑦ ᐅᖓᑖᓂᓪᓘᓐᓃᑦ ᑲᐱᔭᐅᔪᓐᓇᖅᑐᑦ ᕙᐃᓱ-ᐸᐃᐋᓐᑕᒃ (Pfizer-BioNTech) ᑲᐴᑎᒧᑦ.